Sut i wirio bod cwmni neu unigolyn wedi'i awdurdodi

Gwirio a oes gan gwmni y caniatâd cywir yw’r ffordd fwyaf effeithiol a syml o leihau eich risg.

Ond os ydych chi eisiau gwirio unigolyn, gallwch wneud hynny ar y Gofrestr Gwasanaethau Ariannol. Nid oes angen cymeradwyaeth ar bob unigolyn mewn cwmni, felly efallai na fyddant ar y Gofrestr Gwasanaethau Ariannol.

Mae defnyddio cwmni awdurdodedig, yn hytrach nag unigolyn wedi’i gymeradwyo, yn cynyddu’r tebygolrwydd y cewch eich diogelu os aiff rhywbeth o’i le.

Nid yw gweithwyr yr FCA wedi’u rhestru ar ein Cofrestr Gwasanaethau Ariannol na’r Gwiriwr Cwmnïau.

Y Gofrestr Gwasanaethau Ariannol yw’r cofnod cyhoeddus swyddogol ar gyfer pob cwmni ac unigolyn. Mae’n cynnwys ein cofnod rheoleiddio llawn ar gyfer cwmnïau, unigolion, a chyrff eraill, gyda gwybodaeth fanwl gan gynnwys:

• Dirwyon hanesyddol. 
• Hawl cwmnïau i gymeradwyo hyrwyddiadau ariannol. 
• Gallu cwmnïau i drin arian cleientiaid.

Gallwch ddefnyddio’r Gofrestr Gwasanaethau Ariannol i gael gwybod os oedd cwmni wedi’i awdurdodi pan brynoch gynnyrch neu wasanaeth am y tro cyntaf.

Rhaid i gwmnïau gael eu hawdurdodi gennym ni i ddarparu’r mathau canlynol o gynhyrchion a gwasanaethau i chi. Dylech osgoi defnyddio cwmnïau ar gyfer y gwasanaethau canlynol os nad ydynt wedi’u hawdurdodi neu os nad oes ganddynt y caniatâd cywir:

• Cyfrifon banc, er enghraifft, cyfrifon cyfredol a chynilo.
• Benthyca arian, gan gynnwys cardiau credyd, Prynu Nawr a Thalu’n Hwyrach (BNPL), llogi, broceriaeth credyd a chyngor dyled. 
• Gwasanaethau sy’n ymwneud â dyled, gan gynnwys cyngor dyled a chasglu dyled. 
• Platfformau cyllido torfol. 
• Gwasanaethau rheoli hawliadau. 
• Yswiriant (yswiriant bywyd neu yswiriant cyffredinol, er enghraifft, ar gyfer teithio neu eich cartref).
• Cynlluniau angladd.
• Buddsoddiadau, er enghraifft, cyfranddaliadau, cronfeydd a deilliadau.  
• Pensiynau, gan gynnwys cynlluniau pensiwn personol a gweithle. 
• Opsiynau cyllid cartref, er enghraifft, morgeisi preswyl, rhyddhau ecwiti neu gynlluniau prynu cartref (gan gynnwys morgeisi sy’n cydymffurfio â Sharia). 
• Gwasanaethau taliadau ac arian electronig, er enghraifft, waledi ar-lein a throsglwyddiadau arian.

Am restr lawn o’r gweithgareddau rydym yn eu rheoleiddio, gweler y Llawlyfr FCA. Am fwy o wybodaeth am y math o weithgareddau nad ydynt ar hyn o bryd yn rhan o’n cylch gwaith, gweler ein hadroddiad perimedr.  

Rhaid i gwmnïau fod wedi’u cofrestru gyda ni er mwyn i ni allu goruchwylio’r gweithgareddau penodol canlynol. Dylech osgoi defnyddio cwmnïau ar gyfer y gwasanaethau canlynol os nad ydynt wedi’u cofrestru:

• Gwasanaethau crypto penodol, er enghraifft, cyfnewidiadau crypto, peiriannau arian parod (ATM) crypto a darparwyr waled ceidwad (mae’r cwmnïau crypto hynny wedi’u cofrestru gyda ni at ddibenion atal gwyngalchu arian). 
• Morgeisi prynu-i-osod i ddefnyddwyr (CBTL), er enghraifft, os byddwch yn dod yn ‘landlord damweiniol’. (Gweler ‘Cynhyrchion a gwasanaethau nad ydym yn eu rheoleiddio’ ar gyfer morgeisi prynu-i-osod). 
• Gwasanaethau taliadau ac arian electronig a ddarperir gan gwmnïau bach penodol. 
   

Mae cynhyrchion a gwasanaethau ariannol nad ydym yn eu rheoleiddio na’u goruchwylio wedi’u nodi isod. Nid oes angen i gwmnïau gael eu hawdurdodi na’u cofrestru er mwyn darparu rhain:

• Prynu Nawr a Thalu’n Hwyrach (BNPL) heb ei reoleiddio.
• Cyngor ar gynllunio ystadau, ewyllysiau a phrofiant. 
• Trefniadau gwirfoddol unigol (IVAs) (cytundeb rhyngoch chi a’r benthyciwr i ad-dalu eich dyledion dros gyfnod penodol).
• Casglu dyledion biliau treth cyngor, dŵr, nwy neu drydan heb eu talu.
• Morgeisi prynu-i-osod. (Gweler ‘Cynhyrchion a gwasanaethau rydym yn eu goruchwylio’ ar gyfer morgeisi prynu i osod i ddefnyddwyr). 
• Morgeisi a benthyca masnachol.
• Perchnogaeth cyfran gyfnodol. 
   

Efallai y byddwch yn sylwi bod rhai cwmnïau ar y Gwiriwr Cwmnïau a'r Gofrestr Gwasanaethau Ariannol wedi'u rhestru fel cynrychiolwyr penodedig (ARs). Mae hyn yn golygu eu bod yn cyflawni gweithgareddau ar ran cwmni arall, a elwir yn brif gwmni iddynt.

Gall ARs gael mwy nag un prif gwmni. Mae'r prif gwmni yn cytuno pa weithgareddau y gall yr AR eu gwneud ac mae'n gyfrifol am y busnes hwnnw.

Mae'n bwysig eich bod yn gwirio gyda'r prif gwmni os oes gennych bryderon am AR neu'r cynhyrchion a'r gwasanaethau y mae’n gallu eu cynnig. Os yw AR wedi mynd y tu hwnt i'r gweithgareddau y mae'r prif gwmni wedi'u caniatáu, efallai na fyddwch yn cael eich diogelu gan yr Ombwdsmon Ariannol neu'r FSCS os bydd rhywbeth yn mynd o'i le.

Gallwch ddod o hyd i fanylion cyswllt ar gyfer ARs a phrif gwmnïau ar y Gwiriwr Cwmnïau a’r Gofrestr Gwasanaethau Ariannol. Gallwch ofyn i’r prif gwmni gadarnhau pa weithgareddau y mae gan yr AR ganiatâd ar eu cyfer, a sut y byddech yn cael eich diogelu pe bai rhywbeth yn mynd o’i le. 

Mae rhai cwmnïau wedi’u rhestru ar y Gwiriwr Cwmnïau a’r Gofrestr Gwasanaethau Ariannol fel PSD (cyfarwyddeb gwasanaethau talu) neu EMD (cyfarwyddeb arian electronig). Mae hyn yn golygu y gallant ddarparu gwasanaethau talu ar ran cwmni arall, a elwir yn brif gwmni iddynt.

Mae’n bwysig gwirio gyda’r prif gwmni pa weithgareddau y mae gan yr asiant ganiatâd i’w cyflawni. Os yw’r asiant wedi mynd y tu hwnt i’r gweithgareddau y mae’r prif gwmni wedi cytuno arnynt, efallai na fyddwch wedi’ch diogelu gan yr Ombwdsmon Ariannol os byddwch eisiau gwneud cwyn.

Mae hefyd yn bwysig gwybod, os bydd eich asiant yn mynd allan o fusnes, na fydd eich arian yn cael ei ddiogelu gan yr FSCS. Darganfyddwch fwy am sut y byddech yn cael eich diogelu pe bai eich darparwr yn methu.

Gallwch ddod o hyn i fanylion ar gyfer asiantau a’u prif gwmnïau ar y Gwiriwr Cwmnïau a’r Gofrestr Gwasanaethau Ariannol.