Byddwn yn dechrau rheoleiddio Credyd Talu Gohiriedig, a elwir yn aml yn Prynu Nawr a Thalu yn Hwyrach (Buy Now Pay later), ar 15 Gorffennaf 2026. Darganfyddwch beth fydd yn newid.
Pan fyddwch chi'n siopa ar-lein neu mewn siop, mae rhai busnesau yn cynnig opsiwn Prynu Nawr a Thalu yn Hwyrach i gwsmeriaid ar gyfer eu heitemau. Ar hyn o bryd mae 2 fath o gynlluniau Prynu Nawr a Thalu yn Hwyrach; rydym eisoes yn rheoleiddio un o’r rhain, ac un arall a elwir yn Credyd Talu Gohiriedig (Deferred Payment Credit) (CTG).
Mae CTG yn ffurf ddi-log o gredyd, y gellir ei ad-dalu mewn 12 rhandaliad neu lai, dros 12 mis neu lai.
Ar hyn o bryd, nid yw cytundebau CTG yn cael eu rheoleiddio, sy'n golygu nad oes angen i fenthycwyr gael eu hawdurdodi gennym ni neu ddilyn ein rheolau.
Ond o 15 Gorffennaf 2026, bydd hyn yn newid. Bydd angen i fenthycwyr gael eu hawdurdodi gennym neu fod yn rhan o'n cyfundrefn caniatâd dros dro. Mae hyn yn golygu y byddwch chi'n cael mwy o amddiffyniad wrth ddefnyddio CTG, er enghraifft, os bydd rhywbeth yn mynd o'i le ac rydych chi eisiau cwyno.
O fis Gorffennaf 2026, byddwch yn gallu gwirio a all cwmni gynnig CTG ar yr Gwiriwr Cwmnïau FCA.
Gallwch ddarllen mwy am Prynu Nawr a Thalu yn Hwyrach ar HelpwrArian
Beth sy'n mynd i gael ei reoleiddio
Bydd cytundebau CTG yn cael eu rheoleiddio os yw'r benthyciwr a'r cyflenwr nwyddau neu wasanaethau yn fusnesau gwahanol.
Er enghraifft, os ydych chi'n prynu dillad o un siop, ond mae darparwr y credyd yn fusnes gwahanol.
Beth sydd ddim yn mynd i gael ei reoleiddio
Os ydych chi'n prynu rhywbeth gan fusnes ac yn defnyddio CTG sy’n cael ei ddarparu gan yr un busnes, ni fydd yn cael ei reoleiddio.
Bydd unrhyw gytundeb CTG rydych chi'n ei gymryd cyn 15 Gorffennaf 2026 hefyd yn parhau heb ei reoleiddio.
Ni fydd yr amddiffyniadau newydd yn berthnasol i'r cytundebau hyn.
Beth sy'n newid
Rydym am i'n rheolau newydd ar gyfer CTG leihau'r risg o niwed i unigolion sy'n dewis ei ddefnyddio. Bydd angen i fenthycwyr ddilyn y rheolau hyn o 15 Gorffennaf 2026.
Gwirio y gallwch fforddio ad-dalu
Rydym am wneud yn siŵr bod cwmnïau'n benthyca yn gyfrifol ac yn fforddiadwy. Felly, bydd angen i fenthycwyr wirio a allwch fforddio ad-dalu cyn i chi gymryd cytundeb.
Gwybodaeth am eich cytundebau CTG
Rydym am i chi allu penderfynu a yw CTG yn iawn i chi. Felly, bydd angen i fenthycwyr roi gwybodaeth i chi cyn i chi gymryd cytundeb CTG.
Mae hyn yn cynnwys:
- Y swm y byddwch chi'n ei fenthyca.
- Pryd fydd angen i chi wneud ad-daliadau.
- Faint fydd eich ad-daliadau.
- Faint fydd unrhyw ffi hwyr
- Yr hawliau a'r amddiffyniadau sydd gennych.
Os ydych chi'n cael trafferth cadw i fyny â thaliadau
Os byddwch yn colli ad-daliad, bydd angen i gwmnïau gysylltu â chi i roi gwybod i chi ac esbonio beth mae hyn yn ei olygu.
Os ydych chi'n cael trafferth gwneud ad-daliadau, dylech gysylltu â'ch benthyciwr. O dan ein rheolau, bydd angen i gwmnïau roi cymorth i chi.
Os ydych chi'n cael trafferth gydag arian, gallwch gael arweiniad ar ddelio â dyled gan HelpwrArian. Gallwch hefyd ddefnyddio'r teclyn Debt Advice Locator i ddod o hyd i wasanaethau am ddim yn eich ardal.
Os oes angen i chi gwyno
Os ydych chi'n anhapus â'r ffordd y mae eich benthyciwr CTG wedi eich trin, bydd gennych yr hawl i gwyno.
Yn y lle cyntaf, dylech ofyn i'ch benthyciwr roi pethau'n iawn. Ond os ydych chi'n anhapus â'u hymateb, byddwch yn gallu gwneud cwyn i'r Gwasanaeth Ombwdsman Ariannol.
Ad-daliadau
O 15 Gorffennaf 2026, os bydd rhywbeth yn mynd o'i le gyda'r hyn rydych chi wedi'i brynu gan ddefnyddio CTG, efallai y byddwch chi'n gallu cael ad-daliad gan y benthyciwr.
Mae hyn oherwydd y bydd Adran 75 o'r Ddeddf Credyd Defnyddwyr ar gael. Dyma'r un amddiffyniad y byddech chi'n ei gael pe baech chi'n defnyddio cerdyn credyd i dalu.
