Os ydych wedi defnyddio cyllid modur, efallai y bydd iawndal yn ddyledus i chi. Darganfyddwch sut i gwyno a beth i'w ddisgwyl o'n cynllun.
Os ydych wedi defnyddio cyllid modur, efallai y bydd iawndal yn ddyledus i chi. Darganfyddwch sut i gwyno a beth i'w ddisgwyl o'n cynllun.
Os gwnaethoch ddefnyddio cyllid i brynu car, beic modur neu fan rhwng 6 Ebrill 2007 a 1 Tachwedd 2024, efallai y bydd iawndal yn ddyledus i chi.
Nid oedd llawer o fenthycwyr yn datgan gwybodaeth bwysig i gwsmeriaid am eu cytundebau. Roedd hyn yn torri deddfau a'n rheolau oedd mewn grym ar y pryd. Dyna pam rydyn ni wedi lansio cynllun i wneud yn siŵr bod pobl yn cael eu digolledu.
Bydd cyfnod sefydlu fel y gall benthycwyr baratoi.
- Os gwnaethoch gymryd eich benthyciad cyn 1 Ebrill 2014, bydd y cynllun yn dechrau ar 31 Awst 2026.
- Os gwnaethoch gymryd eich benthyciad o 1 Ebrill 2014, bydd y cynllun yn dechrau ar 30 Mehefin 2026.
Efallai y bydd rhai benthycwyr yn dechrau edrych ar hawliadau cyn y dyddiadau hyn.
Pigion cyflym: eich camau nesaf
- Os byddwch yn cwyno cyn i'r cynllun ddechrau, bydd eich achos yn cael ei asesu, ac unrhyw iawndal yn cael ei dalu yn gynt. Nid oes angen i chi ddefnyddio cwmni rheoli hawliadau neu gwmni cyfreithiol.
- Os nad ydych chi'n cwyno, bydd benthycwyr yn cysylltu ag unrhyw un a allai fod yn gymwys am daliad o fewn 6 mis i ddechrau'r cynllun.
- Os ydych chi eisoes wedi cwyno a bod eich benthyciwr wedi cydnabod, nid oes angen i chi wneud unrhyw beth.
- Darganfyddwch pryd y gallech ddisgwyl clywed gan eich benthyciwr.
Os hoffech dderbyn diweddariadau ar ein gwaith sy'n ymwneud â chwynion cyllid modur a'r hyn y mae'n ei olygu i chi, cofrestrwch ar gyfer diweddariadau e-bost. Gallwch ddad-danysgrifio ar unrhyw adeg.
Pryd y dylech glywed gan eich benthyciwr
Dewiswch pryd y gwnaethoch gymryd eich benthyciad i ddarganfod pryd y dylech ddisgwyl clywed gan eich benthyciwr.
I bwy mae hyn yn berthnasol
Gall hyn fod yn berthnasol i chi os:
- Bu i chi ddefnyddio cyllid modur ar gyfer cerbyd modur, er enghraifft, car, beic modur, fan neu ‘campervan’ rhwng 6 Ebrill 2007 a 1 Tachwedd 2024 (mae hyn yn cynnwys cytundebau hurbwrcas (Hire Purchase), fel Pryniant Contract Personol ‘Personal Contract Purchase’), a
- Ni ddwedwyd wrthych am drefniadau penodol rhwng y benthyciwr a'r brocer (pwy bynnag a drefnodd eich benthyciad).
Mae'r trefniadau hyn yn cynnwys:
- Trefniant comisiwn yn ôl disgresiwn (DCA), a oedd yn caniatáu i'r brocer addasu'r gyfradd llog a dalwyd gennych i gael comisiwn uwch.
- Trefniant comisiwn uchel, lle roedd swm y comisiwn o leiaf 39% o gyfanswm cost credyd (y llog a'r taliadau am eich benthyciad) a 10% o'r benthyciad.
- Cysylltiadau cytundebol. Dyma lle dim ond un benthyciwr a ddefnyddiodd eich brocer neu cafodd un benthyciwr yr hawl cyntaf i wrthod eich benthyciad. Fodd bynnag, ni fydd cysylltiadau cytundebol yn cael eu cynnwys pe bai cysylltiadau gweladwy rhwng y benthyciwr, y gwneuthurwr a'r deliwr masnachfraint. Er enghraifft, lle roeddent yn rhannu enw cyffredin neu debyg.
Mae rhai eithriadau. Bydd eich cytundeb yn cael ei ystyried yn deg, os:
- Oedd y comisiwn yn £120 neu lai ar gyfer cytundebau a ddechreuodd cyn 1 Ebrill 2014 a £150 neu lai o'r dyddiad hwnnw ymlaen. Mae symiau comisiwn is na’r lefelau hynny yn annhebygol o fod wedi dylanwadu ar ymddygiad y brocer neu benderfyniad unigolyn.
- Nid oeddech chi'n talu am unrhyw log.
Ni fydd ein cynllun yn berthnasol i chi os:
- Oeddech chi yn lesu modur gyda Contract Hurio Personol (PCH).
- Yw eich cwyn wedi cael ei ystyried yn flaenorol gan y Gwasanaeth Ombwdsmon Ariannol neu wedi ei benderfynu gan y llys.
- Rydych chi eisoes wedi derbyn iawndal.
- Oedd eich cytundeb dros £25,000 cyn 6 Ebrill 2008 neu os oedd at ddibenion busnes.
- Roedd gennych fenthyciad gwerth uchel.
Mewn nifer fach iawn o achosion, efallai y byddwch hefyd wedi rhedeg allan o amser i gael iawndal. Os yw hyn yn berthnasol i chi, bydd eich benthyciwr yn egluro pam.
Faint y gallech ei gael
Rydym yn amcangyfrif bod 12.1 miliwn o gytundebau yn gymwys i gael iawndal. Bydd y rhai sy'n cael iawndal yn derbyn ar gyfartaledd tua £830 fesul cytundeb, ond bydd hyn yn amrywio, gyda rhai pobl yn cael mwy a rhai yn cael llai.
Rydym wedi gosod rheolau ar gyfer sut mae cwmnïau yn asesu hawliadau ac yn cyfrifo unrhyw iawndal. Rydym yn goruchwylio cwmnïau'n agos i wneud yn siŵr eu bod yn eu dilyn.
Nid yw'r math hwn o fenthyca yn cael ei gwmpasu gan y Cynllun Iawndal Gwasanaethau Ariannol, felly os bydd eich benthyciwr yn mynd allan o fusnes, efallai na fyddwch yn cael unrhyw iawndal.
Defnyddio cwmnïau rheoli hawliadau (CMC)
Nid oes angen i chi ddefnyddio CMC neu gwmni cyfreithiol i gymryd rhan yn ein cynllun.
Gallwch gwyno nawr am ddim heb ddefnyddio un, ac nid oes angen i chi ddefnyddio CMC i ddarganfod a ydych chi'n gymwys. Os nad ydych chi'n siŵr pwy oedd eich benthyciwr, mae ffyrdd y gallwch chi wirio.
Os ydych chi'n cofrestru gyda CMC neu gwmni cyfreithiol, efallai y byddwch yn talu am wasanaeth nad oes ei angen arnoch, gan gynnwys hyd at 36% mewn ffioedd, gan gynnwys TAW, allan o unrhyw iawndal a dderbyniwch.
Darganfyddwch beth i'w ddisgwyl os byddwch chi'n penderfynu defnyddio CMC, gan gynnwys sut i wirio a yw CMC neu gwmni cyfreithiol wedi'i awdurdodi i'ch helpu.
Os ydych chi'n dewis defnyddio CMC neu gwmni cyfreithiol, gwnewch yn siŵr nad ydych eisoes wedi cofrestru gyda chwmni arall. Efallai eich bod wedi cofrestru heb sylweddoli hynny. Os ydych chi'n cofrestru gyda mwy nag un cwmni, efallai y bydd yn rhaid i chi dalu ffioedd i ddod â'r cytundeb i ben neu gael mwy nac un cynrychiolwr sy'n hawlio ffioedd llwyddiant. Gallai hefyd achosi oedi i chi dderbyn yr arian sy'n ddyledus i chi.
Eisoes wedi cofrestru gyda CMC neu gwmni cyfreithiol?
Os penderfynwch nad ydych bellach eisiau defnyddio CMC neu gwmni cyfreithiol, gallwch ddod â'ch cytundeb i ben. Ond efallai bydd ffi yn ddyledus. Dylai'r ffi fod yn rhesymol a dylai adlewyrchu'r gwaith y mae'r CMC neu'r cwmni cyfreithiol eisoes wedi'i wneud.
Mae'r rhan fwyaf o hawliadau cyllid modur yn y camau cychwynnol yn unig, felly dylai unrhyw ffioedd y gofynnir i chi eu talu gyd-fynd â'r gwaith a wnaed hyd yn hyn.
Dylech ddisgwyl i'r cwmni egluro’n glir y gwaith hwn a sut mae eu costau wedi'u cyfrifo. Os yw ffioedd yn ymddangos yn uchel neu os yw'r disgrifiad o'r gwaith yn amwys, gan ddefnyddio termau generig fel 'dilyniant achos' neu 'adolygiad ffeiliau' heb fanylion, dylech ofyn am ddadansoddiad ac i'r cwmni gyfiawnhau'r taliadau hynny.
Os ydych chi'n anhapus â'r ffordd rydych chi wedi cael eich trin, gallwch gwyno am CMC neu gwmni cyfreithiol.
Sut i gwyno am gyllid modur
-
1
Cysylltwch â'ch benthyciwr
Chwiliwch ein rhestr o fenthycwyr i ddod o hyd i fanylion cyswllt perthnasol, llythyr cwyn neu e-bost templed, neu ddolen i ffurflen gwyno bwrpasol y benthyciwr.
Os nad ydych chi'n siŵr pwy yw eich benthyciwr:
- Gwiriwch hen ddatganiadau banc.
- Cysylltwch â'r masnachwr lle cawsoch y car.
- Ceisiwch wirio eich ffeil credyd gan y gallai eich benthyciwr gael ei restru yno. Gallwch hefyd geisio gwirio asiantaeth cyfeirio credyd Equifax's Car Finance Checker, sy'n cynnwys y rhan fwyaf o gofnodion cyllid ceir yn ôl i 2007. Gallwch hefyd wirio'ch ffeil credyd am ddim trwy Experian a TransUnion. Darganfyddwch sut i gael mynediad at eich ffeil credyd am ddim o Swyddfa'r Comisiynydd Gwybodaeth.
-
2
Rydych chi'n cael ymateb gan eich benthyciwr
Dylai eich benthyciwr anfon cydnabyddiaeth atoch. Os nad yw'n gwneud hynny, dylech ddilyn i fyny i wirio a yw wedi derbyn eich cwyn.
Mae gan eich benthyciwr 3 mis i ymateb i'ch cwyn gan ddweud wrthych a oes iawndal a faint sy’n ddyledus i chi.
- Os dechreuodd eich cytundeb rhwng 6 Ebrill 2007 a 31 Mawrth 2014, a'ch bod yn cwyno cyn 31 Awst 2026, dylech glywed erbyn 30 Tachwedd 2026 fan bellaf.
- Os dechreuodd eich cytundeb rhwng 1 Ebrill 2014 a 1 Tachwedd 2024 a'ch bod wedi cwyno cyn 30 Mehefin 2026, dylech glywed erbyn 30 Medi 2026 fan bellaf.
-
3
Rydych chi'n ymateb i'ch benthyciwr
Bydd gennych 1 mis i naill ai i dderbyn neu herio ymateb y benthyciwr.
Os ydych chi'n anhapus ag ymateb eich benthyciwr
Os yw eich benthyciwr yn anfon penderfyniad iawndal atoch a'ch bod yn parhau i fod yn anfodlon, gallwch gwyno i'r Gwasanaeth Ombwdsmon Ariannol.
Mae'r Ombwdsmon Ariannol yn wasanaeth am ddim sy'n datrys cwynion rhwng defnyddwyr a busnesau sy'n darparu gwasanaethau ariannol.
Mae'n bwysig eich bod yn cysylltu â'r Ombwdsmon Ariannol erbyn y dyddiad a roddir yn llythyr penderfyniad iawndal eich benthyciwr, neu efallai na fyddant yn gallu helpu.
Os byddwch yn mynd â'ch cwyn i'r Ombwdsmon Ariannol, byddant yn asesu eich hawliad i sicrhau bod rheolau'r cynllun wedi'u dilyn.
-
4
Rydych chi'n derbyn taliad sy'n ddyledus i chi
Ar ôl i chi ymateb i'ch benthyciwr i dderbyn y cynnig, bydd ganddynt 1 mis i dalu eich iawndal i chi.
Efallai y bydd benthycwyr yn gofyn am rif eich cyfrif banc a'ch cod didoli i dalu iawndal i chi. Ond peidiwch â rhannu'r manylion hyn oni bai eich bod chi'n siŵr pwy rydych chi'n delio â nhw. A pheidiwch byth â rhannu eich rhif adnabod PIN a'ch cyfrineiriau gydag unrhyw un.
Mynd â'ch cwyn i'r llys
Gallwch hefyd ddwyn hawliad am eich comisiwn cyllid modur trwy'r llys. Os ydych chi'n ystyried yr opsiwn hwn, dylech feddwl am gael cyngor cyfreithiol annibynnol.
Mae cymryd rhan yn ein cynllun yn debygol o fod yn symlach ac yn cynnig mwy o sicrwydd na mynd â'ch hawliad i'r llys. Ar ôl i ffioedd cyfreithiol gael eu dynnu, gallech gael llai.
Amddiffyn eich hun rhag sgamiau
Rydym wedi derbyn adroddiadau o sgamwyr yn cysylltu â phobl ac yn esgus eu bod o fenthycwyr cyllid modur, gan gynnig iawndal ffug.
Er mwyn eich helpu i wirio eich bod yn delio â chwmni dilys, chwiliwch ein rhestr o fenthycwyr cyllid modur a gwnewch yn siŵr bod y manylion sydd gennych yn cyfateb i fanylion y cwmni gwirioneddol.
Dylech hefyd fod yn ymwybodol o sgamwyr sy'n esgus bod o'r FCA. Ni fyddwn byth yn gofyn i chi drosglwyddo arian atom ac ni fyddwn byth yn gofyn am eich rhif adnabod PIN a'ch cyfrineiriau cyfrif banc.
Darganfyddwch sut i adnabod cyfathrebiadau FCA ffug.
